அஜித் மீது கோபமா? ஒரே போட்டோவால் பஞ்சாயத்தை முடித்து வைத்த விக்னேஷ் சிவன்!

நடிகர் அஜித்தின் துணிவு படத்திற்கு பிறகு இயக்குனர் விக்னேஷ் சிவனுடன் இணையவுள்ளதாகவும் அந்த படத்தை லைகா நிறுவனம் தயாரிக்கவுள்ளதாகவும் அதிகாரப்பூர்வமாக அறிவிக்கப்பட்டது. இந்தப் படத்துக்கு அனிருத் இசையமைக்க இருந்தார். இந்தப் படத்தில் அஜித்துக்கு ஜோடியாக ஐஸ்வர்யா ராய் நடிக்க இருப்பதாகவும் அரவிந்த்சாமி, சந்தானம் முக்கிய வேடங்களில் நடிக்கவுள்ளதாகவும் நாளுக்கு நாள் வெவ்வேறு தகவல்கள் வெளியான வண்ணம் இருந்தன.

கீரிடம், பில்லா படங்களுக்கு பிறகு அஜித் - சந்தானம் காம்போ இணையவிருப்பதால் அஜித் ரசிகர்கள் உற்சாகத்தில் இருந்தனர். இந்தப் படத்திற்கான எதிர்பார்ப்புகளும் அதிகமாய் இருந்து வந்தன.அதுமட்டுமின்றி சில நாட்களுக்கு முன் AK62 படத்தின் டிஜிட்டல் ஒடிடி ஒளிபரப்பு உரிமத்தை பிரபல நெட்ப்ளிக்ஸ் நிறுவனம் கைப்பற்றியுள்ளது என்று அதிகாரப்பூர்வமாக அறிவிக்கப்பட்டது. தமிழ், தெலுங்கு, மலையாளம், கன்னடம் மொழிகளில் இந்த டிஜிட்டல் உரிமம் விற்கப்பட்டிருந்தது குறிப்பிடத்தக்கது.

ஆனால் தயாரிப்பு தரப்புக்கு இந்தப் படத்தின் கதை பிடிக்காததால் விக்னேஷ் சிவன் விலகியதாகவும் வேறு ஒரு இயக்குனர் அந்தப் படத்தை இயக்க உள்ளதாகவும் தகவல்கள் பரவி வந்தன. விக்னேஷ் சிவனுக்கு பதில் அஜித்துடன் அடுத்த படத்திற்காக இயக்குனர் மகிழ் திருமேனி இணையவிருப்பதாகவும் தகவல்கள் வந்தன. விக்னேஷ் சிவன் அவரது ட்விட்டர் பயோவிலும் ஏகே62 இயக்குனர் என்பதை நீக்கினார்.

இதையடுத்து இயக்குனர் விக்னேஷ் சிவன் நடிகர் அஜித் மீது கோபமாக இருப்பதாகவும் தகவல்கள் பரவின. இந்நிலையில் இந்த தகவல்களை எல்லாம் பொய்யாக்கும் வகையில் விக்னேஷ் சிவன் தற்போது அவரது இன்ஸ்டாகிராம் பக்கத்தில் அஜித்தின் புகைப்படத்தை பகிர்ந்து ஹார்ட்டின் எமோஜி விட்டிருந்தார். சமீபத்தில் எடுத்த அஜித் சிரிக்கும் புகைப்படத்தை பகிர்ந்ததன் மூலம் இந்த சர்ச்சைகளுக்கு எல்லாம் அவர் முற்றுப்புள்ளி வைத்துள்ளார். அஜித் அடுத்து இயக்குனர் மகிழ் திருமேனியுடன் இணையவிருப்பதாக கூறப்படுவது குறிப்பிடத்தக்கது.