லியோவுடன் மோதுவதற்காக இப்படியொரு முடிவெடுத்தாரா அஜித்? - ஏகே 62 டைட்டில் குறித்த தகவல்

நடிகர் விஜய் தற்போது லோகேஷ் கனகராஜ் இயக்கத்தில் பிரம்மாண்டமாக தயாராகும் லியோ படத்தில் நடித்துவரும் நிலையில் மற்றொரு பக்கம் நடிகர் அஜித்தின் 62வது படத்தை இயக்கப்போவது யார் என்ற எதிர்பார்ப்பு அவரது ரசிகர்களிடையே எழுந்துள்ளது.

விக்னேஷ் சிவன் சொன்ன கதை தயாரிப்பு தரப்புக்கு திருப்தியில்லாததால் அவருக்கு பதிலாக மகிழ் திருமேனி இயக்கவிருப்பதாகவும் அனிருத் இசையமைக்கவிருப்பதாகவும் தகவல்கல் தெரிவிக்கின்றன. ஆனால் அதிகாரப்பூர்வ தகவல்கள் இதுவரை வெளியாகவில்லை.

முன்னதாக நடிகர் விஜய் தான் தமிழின் நம்பர் 1 என சர்ச்சையான நேரத்தில் அஜித் தனது பலத்தை நிரூபிக்கவே துணிவு படத்தை வாரிசு படத்துடன் வெளியிட்டார் என்றும் சிலர் கிளப்பிவிட்டிருந்தனர். இதனையடுத்து பொங்கல் வின்னர் வாரிசா துணிவா என பெரும் எதிர்பார்ப்பு நிலவியது.

தற்போது இன்னும் அஜித்தின் ஏகே 62 படமே இன்னும் அறிவிக்கப்படவில்லை. லியோ படம் வருகிற அக்டோபர் 19 ஆம் தேதி வெளியாகவுள்ளதாக அறிவிக்கப்பட்டுள்ள நிலையில் அதற்கு போட்டியாக ஏகே 62 படத்தை ரிலீஸ் செய்ய அஜித் திட்டமிட்டிருக்கிறாராம். இதன் காரணமாகவே முன் எப்பொழுதும் இல்லாத அளவுக்கு அஜித் கவனம் செலுத்துவதாகவும் கூறப்படுகிறது. அத்துடன் லியோவுக்கு போட்டியாக அஜித் நடிக்கும் படத்திற்கும் ஆங்கில பெயரை சூட்டவுள்ளதாகவும் சொல்லப்படுகிறது.

மேலும் இந்தப் படத்திற்கு டெவில் உட்பட 3 ஆங்கில பெயர்கள் பரீசிலனையில் இருப்பதாகவும் விரைவில் படத் தலைப்புடன் அறிவிப்பு வெளியாகும் என்று கூறப்படுகிறது.