வரும் கல்வியாண்டிற்கான 12ம் வகுப்புத் தேர்வுகள் எப்போது தொடங்கும்: சிபிஎஸ்இ முக்கிய அறிவிப்பு

உலகம் முழுவதும் கொரோனா நோய்த் தொற்று குறைந்து வருவதைக் கணக்கில் கொண்டு, 2023 கல்வியாண்டிற்கான 12ம் வகுப்பு தேர்வு தேதிகளை சிபிஎஸ்இ அறிவித்துள்ளது.

கொரோனா முதலாவது பெருந்தொற்று அலை காரணமாக, 2020ம் ஆண்டு ஜூலை 1 ஆம் தேதி முதல் 15 ஆம் தேதி வரை நடக்கவிருந்த 10 மற்றும் 12ஆம் வகுப்புக்களுக்கான தேர்வுகளை மத்திய இடைநிலைக் கல்வி வாரியம் (CBSE) ரத்து செய்தது. கொரோனா இரண்டாவது அலை காரணமாக, 2021 மே 4 முதல் ஜூன் 14 வரை நடக்கவிருந்த 10,12-ஆம் வகுப்புகள் தேர்வுகள் ரத்து செய்யப்பட்டன.

மீண்டும் அத்தகைய எதிர்பாராத சூழல் ஏற்படுவதைத் தவிர்க்கும் பொருட்டு, 2022 கல்வியாண்டுக்கான பொதுத் தேர்வை இரண்டு அமர்வுகளாக (Special Academic Session 2021-22) சிபிஎஸ்இ நடத்தி முடித்தது. அதற்கான, தேர்வு முடிவுகள் இன்று வெளியிடப்பட்டன. முதலாவது அமர்வுக்கு  30% முக்கியத்துவமும், இரண்டாவது அமர்வுக்கு 70% முக்கியத்துவமும் கொண்டு 12ம் வகுப்பு இறுதி மதிப்பெண் பட்டியல் தயாரிக்கப்பட்டதாக சிபிஎஸ்இ தெரிவித்தது.

இதையும் வாசிக்க: CBSE WEIGHTAGE: இரண்டாவது அமர்வுக்கு கூடுதல் முக்கியத்துவம் கொடுத்த சிபிஎஸ்இ

இந்நிலையில், உலகளவில் கொரோனா நோய்த் தொற்று பரவல் குறைந்து வருவதாலும், தடுப்பூசி போட்டுக்  கொண்டவர்களின் எண்ணிக்கை அதிகரித்து வருவதாலும், இனிவரும் காலங்களில்  பழைய முறையில் (ஆண்டு இறுதித் தேர்வு முறையில் - Annual Examination Pattern) 10, 12ம் வகுப்பு வாரியத் தேர்வுகள் நடத்தப்படும் என்று சிபிஎஸ்இ முன்னதாக தெரிவித்திருந்தது.  இருப்பினும், மாணவர்களின் மனஉளைச்சலைக் குறைக்கும் வகையில், இந்த (2023ம்) ஆண்டுக்கான பாடத்திட்டத்தில் உரிய விகிதத்தில் பாடஅளவு குறைக்கப்படும் என்றும் தெரிவிக்கப்பட்டது.

இதையும் வாசிக்க: CBSE 12 Results Out: மாணவர்களை விட மாணவிகள் சுமார் 3.29% அதிகமாக தேர்ச்சி

இந்நிலையில், இந்த கல்வியாண்டிற்கான வாரியத் தேர்வு தேதிகளை சிபிஎஸ்இ வாரியம் அறிவித்துள்ளது. அறிவிப்பில், " உலகம் முழுவதும் கொரோனா தொற்றின் தாக்கம் குறைந்து வருவதால், வரும் கல்வியாண்டிற்கான 12ம் வகுப்பு பொது தேர்வை 2023, பிப்ரவரி 15ம் தேதியில் இருந்து தொடங்க வாரியம் முடிவெடுத்துள்ளது" என்று தெரிவித்துள்ளது.