Home /News /coronavirus-latest-news /

பாடகி ரிஹானா நாட்டுக்கு கொரோனா தடுப்பூசி அனுப்பிய இந்தியா.. நன்றி தெரிவித்து பார்படாஸ் பிரதமர் கடிதம்..

பாடகி ரிஹானா நாட்டுக்கு கொரோனா தடுப்பூசி அனுப்பிய இந்தியா.. நன்றி தெரிவித்து பார்படாஸ் பிரதமர் கடிதம்..

பார்படாஸுக்கு அனுப்பப்பட்ட தடுப்பூசிகள்

பார்படாஸுக்கு அனுப்பப்பட்ட தடுப்பூசிகள்

இந்திய விவசாயிகளின் போராட்டத்துக்கு ஆதரவாக குரல் கொடுத்த பாப் பாடகி ரிஹானாவின் சொந்த நாடான பார்படாஸூக்கு இந்தியா கோவிட் தடுப்பூசி அனுப்பி வைத்துள்ள நிலையில், மோடிக்கு அந்நாட்டு பிரதமர் நன்றி தெரிவித்துள்ளார்.

புதிய வேளாண் மசோதாக்களை எதிர்த்து ஏறத்தாழ 3 மாதங்களுக்கும் மேலாக கடும் குளிரையும் பொருட்படுத்தாமல் பஞ்சாப், ஹரியான உள்ளிட்ட மாநிலங்களைச் சேர்ந்த விவசாயிகள் டெல்லியின் எல்லையில் தொடர் போராட்டத்தில் ஈடுபட்டு வருகின்றனர். போராட்டத்தில் ஈடுபட்டு வரும் விவசாயிகளுடன் மத்திய அரசு நடத்திய பல கட்ட பேச்சுவார்த்தைகளும் தோல்வியில் முடிந்த நிலையில், சட்டத்தை திரும்ப பெற்றால் மட்டுமே போராட்டத்தைக் கைவிடுவோம் என விவசாயிகள் திட்டவட்டமாக தெரிவித்துள்ளனர்.

தொடர் போராட்டத்தில் ஈடுபட்டு வரும் விவசாயிகளுக்கு இந்தியா அளவில் மட்டுமல்லாது உலகளவில் இருந்தும் ஆதரவு குரல்கள் எழத் தொடங்கியுள்ளன. குறிப்பாக, பாப் பாடகி ரிஹானா, மியா கலிஃபா, கிரேட்டா தன்பெர்க் உள்ளிட்டோர் விவசாயிகளுக்காக ஆதரவு தெரிவித்தது, உலகளவில் மிகப்பெரிய கவனத்தை ஈர்த்தது. இந்தியாவில் சர்ச்சையாக உருவெடுத்தது.

ரிஹானா உள்ளிட்டோருக்கு பதிலடி கொடுக்கும் விதமாக சச்சின் டெண்டுல்கர், அக்ஷய் குமார், சாய்னா நேவால், விராட் கோலி, அனில் கும்ப்ளே, ரோஹித் என திரைத்துறை, விளையாட்டுதுறையைச் சேர்ந்த பிரபலங்கள் ட்விட்டரில் 'இந்தியா டுகெதர்' என்ற ஹேஸ்டேக்கின் கீழ் கருத்து தெரிவித்தனர். அதில், இந்திய இறையாண்மைக்குள் வெளிநாட்டினர் பார்வையாளர்களாக மட்டுமே இருங்கள் என வலியுறுத்தினர். அதேவேளையில் இர்பான் பதான் உள்ளிட்டோர், அமெரிக்காவில் கருப்பின ஆண் ஒருவர் தாக்கப்பட்டபோது இந்தியாவில் கருத்து தெரிவித்ததை சுட்டிக்காட்டி, இந்திய பிரபலங்களுக்கு மறைமுகமாக பதிலடி கொடுத்தனர்.

விவசாயிகளின் போராட்டம் உலகளவில் கவனம் பெற்றதற்கும், இந்தியாவில் சர்ச்சையாக வெடித்ததற்கும் பிரபல பாப் பாடகி ரிஹானாவின் ட்விட்டர் பதிவு காரணமாக இருந்தது. இந்நிலையில், அவரின் சொந்த நாடான பார்படாஸ் மற்றும் டொமினிக் குடியரசுக்கு இந்தியா கோவிட் தடுப்பூசிகளை அனுப்பி வைத்துள்ளது. ஞாயிற்றுக்கிழமை நள்ளிரவு 11.35 மணியளவில் இரு நாடுகளுக்கும் கோவிட் தடுப்பூசிகள் மும்பையில் இருந்து அனுப்பி வைக்கப்பட்டன. முன்னதாக, கோவிட் தடுப்பூசிகளை பார்படாஸூக்கு அனுப்பும் இந்தியாவின் முடிவுக்கு நன்றி தெரிவித்து அந்நாட்டு பிரதமர் மியா மோட்லி (Mia Mottley) கடிதம் அனுப்பியிருந்தார். அதில், கோவிட் தடுப்பூசிகளை இந்தியா தாராளமாக தங்கள் நாட்டுக்கு வழங்குவதற்கு, பார்படாஸ் மக்களின் சார்பாக நன்றியை கூறிக்கொள்வதாக குறிப்பிட்டிருந்தார்.  

பார்படாஸூக்கு ஒரு லட்சம் கோவிட் தடுப்பூசிகளை வழங்க இந்தியா முடிவு செய்துள்ளதாக கூறப்படுகிறது. ஏற்கனவே அண்டை நாடுகளான பூட்டான், மாலத்தீவு, வங்கதேசம் மற்றும் நேபாளம் ஆகிய நாடுகளுக்கு கோவிட் தடுப்பூசி வழங்கப்பட்டது. அடுத்தகட்டமாக மியான்மர், சீஷெல்ஸ் நாடுகளுக்கு தடுப்பூசிகளை இந்தியா வழங்க உள்ளது.
Published by:Ram Sankar
First published:

Tags: Corona virus, Farmers, Rihanna

அடுத்த செய்தி