CoronaVirus | தமிழகத்தில் 2-வது நாளாக குறைந்து வரும் கொரோனா தொற்று

தமிழகத்தில் தொடர்ந்து இரண்டாவது நாளாக கொரோனா பாதிப்பு சற்று குறைந்துள்ளது. உயிரிழப்பு விகிதமும் குறைந்து வருகிறது.

தமிழகத்தில் கொரோனா பரவலைத் தடுக்க அரசு பல்வேறு நடவடிக்கைகளை எடுத்த போதிலும், தினசரி பாதிப்பு எண்ணிக்கை அதிகரித்து வந்தது. கடந்த, 21-ம் தேதி உச்சபட்சமாக ஒருநாள் பாதிப்பு 36184 ஆக அதிகரித்தது.

ஆனால், தொடர்ந்து 2-வது நாளாக பாதிப்பு கணிசமாக குறைந்தது. அதன்படி, தமிழகத்தில் புதிதாக தொற்று பாதித்தவர்களின் எண்ணிக்கை 35483-ஆக குறைந்துள்ளது. 12 வயதுக்கு உட்பட்ட ஆயிரத்து 389 பேருக்கு ஒரே நாளில் தொற்று உறுதிசெய்யப்பட்டுள்ளது.

தமிழகத்தில் ஒட்டுமொத்த கொரோனா பாதிப்பு 18 லட்சத்து 42 ஆயிரத்து 344 ஆக அதிகரித்துள்ளது. புதிய உயிரிழப்பும் 484-ல் இருந்து 422-ஆக குறைந்துள்ளது. ஒட்டுமொத்த உயிரிழப்பு 20 ஆயிரத்து 468 ஆகியுள்ளது.

கொரோனா வைரஸிலிருந்து ஒரே நாளில் 25 ஆயிரத்து 196 பேர் குணமடைந்தனர். ஒட்டுமொத்தமாக இதுவரை 15 லட்சத்து 27 ஆயிரத்து 733 பேர் குணமடைந்துள்ளதாக மருத்துவத் துறை தெரிவித்துள்ளது.