• HOME
  • »
  • NEWS
  • »
  • business
  • »
  • ஃபிக்சட் டெபாசிட் போல மியூச்சுவல் ஃபண்ட்கள் ஏன் நிலையான வட்டி விகிதத்தை வழங்குவதில்லை? காரணம் இதோ!

ஃபிக்சட் டெபாசிட் போல மியூச்சுவல் ஃபண்ட்கள் ஏன் நிலையான வட்டி விகிதத்தை வழங்குவதில்லை? காரணம் இதோ!

காட்சி படம்

காட்சி படம்

Mutual Funds : ஃபிக்சட் டெபாசிட் மற்றும் மியூச்சுவல் ஃபண்ட் இடையே உள்ள வேறுபாடுகள் என்ன ?

  • Share this:
    பெரும்பாலும், ஒரு நிதித்திட்டத்தில் முதலீடு செய்யும் போது, நாம் பார்க்கும் முக்கியமான விஷயம், எவ்வளவு இலாபம் கிடைக்கும் அல்லது குறிப்பிட முதலீடு எவ்வளவு வட்டி அளிக்கிறது என்பதே ஆகும். நல்ல வருமானம் மற்றும் வட்டி அளிக்கும் முதலீடு வகையை தேர்வு செய்ய வேண்டும் என்று வரும் போது, நீங்கள் பல விதமான முதலீட்டு வகைகளை அறிந்து வைத்திருக்க வேண்டும்.

    பல்வேறு முதலீட்டு விருப்பங்களில் பெரும்பாலானவர்களால் தேர்வு செய்யப்படும் முதலீட்டு வகைகளில், ஃபிக்சட் டெபாசிட் மற்றும் மியூச்சுவல் ஃபண்ட், இரண்டுமே இருக்கின்றன. இரண்டு விதமான முதலீடுகளும் வெவ்வேறு விதமாக இயங்கக்கூடியவை. ஒவ்வொன்றும் தனித்துவமானது மற்றும் குறிப்பிட்ட காலத்திற்கு முதலீட்டாளர்களுக்கு நல்ல வருமானத்தை அளிக்கின்றன.

    ஃபிக்சட் டெபாசிட் என்பது ஒரு குறிப்பிட்ட தொகையை குறிப்பிட்ட காலத்துக்கு வங்கியில் வைப்பு நிதியாக செலுத்துவது. நீங்கள் முதலீடு செய்த தொகைக்கு குறிப்பிட்ட அளவு நிலையான வட்டி வழங்கப்படும். மியூச்சுவல் ஃபண்டு என்பது ஒரு கலவையான முதலீட்டுத் திட்டம். நீங்கள் முதலீடு செய்யும் பணம், பல்வேறு திட்டங்களில், துறைகளில் உங்கள் சார்பாக, மியூச்சுவல் ஃபண்டு மேனேஜரால் நிர்வகிக்கப்படும். இதிலே, ஈக்விட்டி பங்குகள், கடன் பங்குகள், நில முதலீடு, தங்கம் முதலீடு உள்ளிட்ட பல்வேறு திட்டங்களின் கலவையாக உங்கள் முதலீட்டு போர்ட்ஃபோலியோ இருக்கும்.

    ஃபிக்சட் டெபாசிட் போல ஏன் மியூச்சுவல் ஃபண்ட் நிலையான வட்டி விகிதத்தை வழங்குவதில்லை என்பதை அறிந்து கொள்ளும் முன், இரண்டு நிதித் திட்டங்களுக்கும் இடையே உள்ள வேறுபாடுகளைக் காணலாம்.

    also read : மியூச்சுவல் பண்ட்ஸ் ஒரு பார்வை- எந்த விதமான முதலீட்டை தேர்ந்தெடுப்பது நல்லது?

    முதலீட்டின் மீதான வருவாய் ஒரு நிலையான வைப்பு நிதி, முன்கூட்டியே தீர்மானிக்கப்பட்ட வருமானத்தை ஈட்டுகிறது. முதலீடு முதிர்வாகும் காலம் முழுவதும் இது மாறாது. ஆனால், மியூச்சுவல் ஃபண்டுகளில், முன்கூட்டியே இவ்வளவு தொகையை வருமானமாக ஈட்ட முடியும் என்று தெரிந்து கொள்ள முடியாது.

    வட்டி விகிதம் :

    நிலையான வைப்பு நிதிகளின் வட்டி விகிதம் காலம் மற்றும் வகையைப் பொறுத்து வங்கிகளால் மற்றும் நிதி நிறுவனங்களால் நிர்ணயிக்கப்படுகிறது. எனவே, அதிகளவு வட்டி விகிதம் வழங்கப்படுவதில்லை. மறுபுறம், மியூச்சுவல் ஃபண்டுகளின் வருவாய் விகிதம் சந்தையின் ஏற்ற இறக்கம் மற்றும் நிதி வகையைப் பொறுத்து அமைகிறது. சந்தை உயரும்போது, நீங்கள் அதிக வருமானத்தை எதிர்பார்க்கலாம் மற்றும் சந்தை மதிப்பு சரியும் போது, உங்கள் வருமான விகிதமும் சரியும்.

    அபாயங்கள் - ஆபத்து உண்டாக்கும் காரணிகள் :

    நிதிச் சந்தையில், பல திட்டங்களில் முதலீடு செய்யபப்டும் மியூச்சுவல் ஃபண்டுகள் பல்வேறு ஆபத்தை கொண்டிருக்கின்றன. குறிப்பாக, பங்குச் சந்தையில் ஒவ்வொரு வகை முதலீடும் ஏதோ ஒரு அபாயத்தைக் கொண்டுள்ளன. உதாரணமாக, பங்குச் சந்தையில் முதலீடு செய்யப்பட்ட தொகையின் பெரும்பகுதியைக் கொண்ட ஈக்விட்டி மியூச்சுவல் ஃபண்டுகள், கடன் மியூச்சுவல் ஃபண்டுகளை விட அதிக ஆபத்தைக் கொண்டுள்ளன. வைப்பு நிதியில், பாதுகாப்பான நிலையில், வட்டி விகிதம் இவ்வளவு தான் என்று முன்கூட்டியே தீர்மானிக்கப்பட்டிருப்பதால், ஃபிக்சட் டெபாசிட் மிகவும் பாதுகாப்பானதாகக் கருதப்படுகிறது. நிலையான வைப்பு முதலீட்டாளர்களுக்கு உத்தரவாதமான வருமானத்தை வழங்குகிறது, ஆபத்துகள் இல்லாதவை.

    also read : மியூச்சுவல் ஃபண்ட்ஸ் என்றால் என்ன? இதில் முதலீடு செய்வதால் கிடைக்கும் நன்மைகள்!

    பணவீக்கத்தின் தாக்கம் :

    வட்டி விகிதம் முன்கூட்டியே தீர்மானிக்கப்பட்டிருப்பதால், நிலையான வைப்புக்கள் பணவீக்க பாதிப்பிலிருந்து தப்பித்து விடும். மியூச்சுவல் ஃபண்ட் வருமானம் என்பது கணிக்க முடியாதது. உங்கள் முதலீடுகள் மதிப்பு அதிகரித்தால், பணவீக்க பாதிப்பு தெரியாது. அதே நேரத்தில், பணவீக்கம் குறையும் போது சிறந்த வருமானத்தை உருவாக்கும்.

    லாக்-இன் பீரியட் :

    முதலீடு செய்யப்பட்ட தொகை குறிப்பிட்ட காலத்திற்கு நீங்கள் பயன்படுத்த முடியாதவாறு லாக்-இன் செய்யப்பட்டிருப்பதால், நிலையான வைப்புக்கள் லிக்விட் முதலீடாக இருக்காது. முதிர்வுக்கு முன்னரே நீங்கள் நிதியை திரும்ப எடுக்க வேண்டுமென்றால், அதற்கான அபராதம் விதிக்கப்படும். மறுபுறம், மியூச்சுவல் ஃபண்டுகள் அதிக பணப்புழக்கத்தைக் கொண்டுள்ளன, ஏனெனில் நிதியின் மதிப்பைக் குறைக்காமல், குறுகிய காலத்திற்குள் கூட நிதியை விற்பனை முடியும்.

    ஃபிக்சட் டெபாசிட் எனப்படும் நிலையான வைப்பு நிதி, இது குறுகிய கால மற்றும் நீண்ட கால முதலீடுகளுக்காக வங்கிகளால் வழங்கப்படும் மிகவும் பிரபலமான சேமிப்பு முறையாகும். இந்த முதலீட்டு வகைகளுக்கான வருமான விகிதம் இந்திய அரசால் நிர்ணயிக்கப்படுகிறது. எனவே பணவீக்கம் அதிகரித்தாலும், அது நிலையான வைப்பு நிதியின் வருமானத்தை பாதிக்காது. குறிப்பாக, இந்த முதலீட்டில் இருந்து கிடைக்கும் வருமானத்தின் மீது வரி விதிக்கப்படுகிறது. மறுபுறம், மியூச்சுவல் ஃபண்டுகள் பங்குச்சந்தை அடிப்படையில் இயங்கும் முதலீட்டு திட்டங்களாகும். இவற்றுக்கு நிலையான வருவாய் விகிதம் இல்லை. ஆனாலும், இந்த மியூச்சுவல் ஃபண்டுகள், குறைந்தபட்சமாக, 10-15% வருவாயைக் கொடுக்கும்.

    ஒரு மியூச்சுவல் ஃபண்ட் திட்டத்தில் இருந்து உங்களுக்கு கிடைக்கும் வருமானம் அல்லது லாபம் என்பது பல்வேறு காரணங்களால் நிர்ணயிக்கப்படுகிறது. முதலீடு செய்யப்பட்ட துறைகளில் காணப்படும் ஏற்ற இறக்கங்கள், பங்குச்சந்தை போக்குகள், நிதி மேலாண்மை நிர்வாகத்தின் செயல்பாடு, உங்கள் முதலீட்டின் கால அளவு, ஆகியவை உங்கள் முதலீடு எவ்வளவு பணம் ஈட்டும் என்பதை நிர்ணயம் செய்யும் காரணங்கள் ஆகும். இவற்றில், எதையுமே நம்மால் முன்கூட்டியே திட்டவட்டமாக அறிய முடியாது. நிதிகள் பற்றி, முதலீட்டுத் துறைகள் பற்றி நன்கு அறிந்தவர்களும் ஓரளவுக்கு கணிக்க முடியுமே தவிர்த்து, துல்லியமாக இவ்வளவு லாபம் வரும் என்று கூற முடியாது.

    பல சூழ்நிலைகளில், எதிர்பாராத காரணங்களால் ஒரு நிறுவனத்தின் அல்லது ஒரு குறிப்பிட்ட துரையின் பங்கு மதிப்பு குறையும் அல்லது அதிகரிக்கும். அந்த நேரங்களில், உங்கள் போர்ட்ஃபோலியோ ஈட்டும் வருமானமும் பாதிக்கப்படும். எனவே, மியூச்சுவல் ஃபண்ட் முதலீடுகளால் எப்போதுமே வைப்பு நிதிகளைப் போல நிலையான வட்டியைக் கொடுக்க முடியாது.

    மேலே குறிப்பிட்ட எந்த காரணங்களும் வைப்பு நிதியை பாதிப்பதில்லை. எனவே, குறிப்பிட்ட காலகட்டத்துக்கு உங்களுக்கு கிடைக்கும் ரிட்டன்கள் மாறாது. நீங்கள் ஐந்து வருட காலத்துக்கு ஒரு லட்ச ரூபாய் நிலையான வைப்பு நிதியில் முதலீடு செய்யப் போகிறீர்கள் என்றால், அந்த முதலீடு எவ்வளவு வட்டி பெறும் என்பதை நீங்கள் முன்கூட்டியே கூறிவிட முடியும். ஐந்து ஆண்டுகள் கடந்தும், எந்த மாற்றமும் ஏற்படாது. நிலையான வைப்பு நிதிகளுக்கு, அதன் தொகை மற்றும் கால அளவுக்கு ஏற்ப, வங்கிகள் எவ்வளவு வட்டி அளிக்கின்றன என்பதை நீங்கள் வங்கிகளிடமிருந்தே தெரிந்து கொள்ளலாம்.

    Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தைஇங்கே கிளிக்செய்து ஃபாலோ செய்யுங்கள்.. செய்திகளை உடனுக்குடன் பெறுங்கள். Also Follow @ Facebook, Twitter, Instagram, Sharechat,Telegram, YouTube

    Published by:Tamilmalar Natarajan
    First published: