கோவின் தளம் முழு விவரத்தையும் சொன்னது- 'தி வயல்' ஆவணப் படத்தில் பேசிய பிரதமர் மோடி

இந்தியாவின் கொரோனா தடுப்பு மருந்தின் பயணத்தை விவரிக்கும் விதமாக ஹிஸ்டரி டிவி18 ‘தி வயல்’ (The Vial) என்ற ஒரு மணிநேர ஆவணப்படம் வெளியாகி கவனம் ஈர்த்து வருகிறது. கொரோனா தொற்றை இந்தியா வெற்றிகரமாக வென்றது குறித்து பிரதமர் நரேந்திர மோடி இந்த ஆவணப்படத்தில் பேசியுள்ளார்.

ஜனவரி 16, 2021 -ஆண்டு உலக அளவில் மிகப்பெரிய கொரோனா தடுப்பு மருந்து வழங்கும் திட்டமாக இந்தியாவின் கொரோனா தடுப்பு மருந்து வழங்கல் திட்டம் தொடங்கப்பட்டது . பிரதமர் மோடி தலைமையிலான அரசு பல சவாலான சூழ்நிலைகளை கடந்து வெற்றிகரமாக இத்திட்டத்தை முடித்தது.

கொரோனா பாதிப்பு நேரத்தின்போது உலகத்திற்கே தடுப்பூசிகளை வழங்கி இந்தியா அளப்பரிய உதவிகளை உலக நாடுகளுக்குச் செய்தது. பிரதமர் மோடியின் தலைமையிலான மத்திய அரசு மேற்கொண்ட முயற்சிகள் இந்தியா மட்டுமல்லாமல் உலக நாடுகளுக்கும் பலன் அளித்தன.

அந்த வகையில், கொரோனா தடுப்பு மருந்தின் பயணத்தை ஆவணப்படுத்தும் நோக்கில் ‘தி வயல்’ என்ற ஆவணப்படத்தை ஹிஸ்டரி டிவி18 சேனல் உருவாக்கியுள்ளது. கொரோனாவுக்கு எதிராக கோவின் செயலாற்றிய விதம் குறித்து பிரதமர் நரேந்திர மோடி பேசியுள்ளார்.

"கோவின் தளத்துக்கு நன்றி சொல்லும் ஒரே நாடு இந்தியாதான். கொரோனா காலக்கட்டத்தில் மக்கள் எங்கு சென்று தடுப்பூசி செலுத்த வேண்டும். தடுப்பூசி மையங்களில் கூட்ட நெரிசலை தடுப்பதற்காக எந்த நேரத்தில் செல்ல வேண்டும். இரண்டாவது டோஸ் எப்போது போட வேண்டும் என்பது எல்லாம் அவர்களுக்கு தெரிவிக்கப்பட்டது. இதற்கு தொழில்நுட்பம் மிகவும் உதவியாக இருந்தது” என்றார்.

இந்தி திரையுலகின் முன்னணி நடிகராக இருக்கும் மனோஜ் பாஜ்பாய் கூறுகையில், “ இந்த ஆவணப்படத்தில் அந்த மருந்து எப்படி உருவாக்கப்பட்டது, ஆராய்ச்சியின்போது ஏற்பட்ட சவால்கள் உள்ளிட்டவை குறித்து விவரிப்பதாக அமைக்கப்பட்டுள்ளது.” என்றார்.

தேசிய சுகாதார ஆணையத்தில் முதன்மை செயல் அதிகாரி டாக்டர் சர்மா பேசுகையில், “ கோவின் தளம் மிகவும் வெளிப்படையாக இருந்தது. விஜபி முதல் ஏழை மக்கள் வரை அனைவரும் எளிமையாக தெரிந்துக்கொள்ளும் வண்ணம் இருந்தது. கனடா, மெக்ஸிகோ, நைஜீரியா மற்றும் பனாமா உள்ளிட்ட 50-க்கும் மேற்பட்ட நாடுகள் இந்த கோவின் அமைப்பை செயலாற்ற ஆர்வம் காட்டின. இந்தியா இந்த மென்பொருள்களை இலவசமாக வழங்க தயாராக உள்ளது” என்றார்.

இந்த 60 நிமிட ஆவணப்படத்தில் பிரதமர் நரேந்திர மோடி முதலில் பேசுகிறார். கொரோனா வைரஸ் தொற்றுக்கு எதிரான இந்தியாவின் வெற்றியை பற்றி விரிவாக பேசுகிறார்.

குறிப்பாக, கொரோனாவுக்கு தடுப்பு மருந்து கண்டுபிடிக்கப்பட்ட கால வரிசைப்படி இந்த ஆவணப்படம் உருவாக்கப்பட்டுள்ளது. புனேயில் உள்ள தேசிய வைரலாஜி நிறுவனத்தில் மாதிரிகள் சேகரிக்கப்பட்டது முதல் கோடிக்கணக்கான வயல்கள் (மருந்து குப்பிகள்) உற்பத்தி செய்யப்பட்டது வரை அனைத்தும் இதில் ஆவணப்படுத்தப்பட்டுள்ளன.