கர்நாடகாவில் தொங்கு சட்டப்பேரவையா...? கருத்துக் கணிப்புகள் முழு விவரம் இதோ...!

கர்நாடகாவில்  உள்ள 222 சட்டப்பேரவைத் தொகுதிகளுக்கான தேர்தலில், ஆட்சி அமைக்க 113 இடங்கள் தேவைப்படுகிறது. கடந்த 2018 சட்டப்பேரவைத் தேர்தலில், 104 தொகுதிகளில் வெற்றி பெற்று தனிப்பெரும் கட்சியாக பாஜக உருவெடுத்தாலும் அதற்கு பெரும்பான்மை கிடைக்கவில்லை. இதனையடுத்து, 78 தொகுதிகளில் வென்ற காங்கிரஸ் கட்சியும், 33 இடங்களைக் கைப்பற்றிய மதச்சார்பற்ற ஜனதா கட்சியும் கூட்டணி சேர்ந்து ஆட்சி அதிகாரத்தை கைப்பற்றின.

இந்த கூட்டணி தொடக்கத்தில் இருந்தே பல்வேறு முரண்பாடுகளை சந்தித்து வந்த நிலையில், 14 காங்கிரஸ் எம்எல்ஏ-க்களும் , மூன்று மதச்சார்பற்ற ஜனதா தளம் எம்எல்ஏ-க்களும் பாஜகவுக்கு தாவினார். இதனையடுத்து, காங்கிரஸ் கூட்டணி ஆட்சி கவிழ்ந்தது. கட்சித் தாவிய உறுப்பினர்களின் ஆதரவுடன் பாஜக ஆட்சி அமைத்தது.

எனவே, இந்த தேர்தலில்  காங்கிரஸ், பாஜக என இரண்டு கட்சிகளுமே அரிது பெரும்பான்மையுடன் ஆட்சி அமைக்க வேண்டும் என்ற குறிக்கோளுடன் தேர்தல் பிரச்சாரம் மேற்கொண்டன. இன்று தேர்தல் வாக்குப்பதிவு முடிந்த சற்று நேரத்தில் தேர்தலுக்கு பிந்தைய கருத்துக் கணிப்புகள் வெளியாகியுள்ளன.

தேர்தலுக்கு பிந்தைய கருத்துக் கணிப்புகள்: 

ETG Research எனும் ஆய்வு நிறுவனம் மேற்கொண்ட கருத்துக் கணிப்பில், காங்கிரஸ் கட்சி 106 முதல் 120 இடங்களில் வென்று பெரும்பான்மையுடன் ஆட்சி அமைக்க வாய்ப்புள்ளதாக தெரிவித்துள்ளது. அதேசமயம்,  பாஜக 78 முதல் 92 தொகுதிகளைக் கைப்பற்றும் என்றும், மதச்சார்பற்ற ஜனதா தளம் 20 முதல் 26 இடங்களை கைப்பற்றும் என்றும் தெரிவித்துள்ளது.

பிரபல செய்தி நிறுவனமான டைம்ஸ்- நவ் நடத்திய கருத்துக் கணிப்பில், " காங்கிரஸ் கட்சி 106 முதல் 120 இடங்களில் வென்று பெரும்பான்மையுடன் ஆட்சி அமைக்க வாய்ப்புள்ளதாக தெரிவித்துள்ளது. அதேசமயம், தற்போதைய ஆளுங்கட்சியான பாஜக 79 முதல் 92 தொகுதிகளைக் கைப்பற்றும்" என்றும் தெரிவித்துள்ளது.

ரிபப்ளிக் வெளியிட்ட கருத்துக் கணிப்பில், பாஜக 84 - 100 தொகுதிகள் வரையும், காங்கிரஸ் 94- 108 வரையிலும், மஜத 24 - 32 தொகுதிகள் வரையிலும் கைப்பற்ற வாய்ப்புள்ளதாக தெரிவித்துள்ளது.

ஜான் கி பாத் செய்தி நிறுவனம்  வெளியிட்ட கணிப்பில் பாஜக 94 முதல் 117 இடங்கள் வரை கைப்பற்றும் என்றும், காங்கிரஸ் கட்சி 91 முதல் 106 இடங்கள் வரை கைப்பற்றும் என்றும் மதச்சார்பற்ற ஜனதா தள் 14 முதல் 24 இடங்கள் வரை கைப்பற்றும் என்றும் தெரிவித்தது.

ஜி நியூஸ் செய்தி நிறுவனம் வெளியிட்ட கருத்துக் கணிப்பில், காங்கிரஸ் கட்சி 103 முதல் 118 இடங்களில் வென்று பெரும்பான்மையுடன் ஆட்சி அமைக்க வாய்ப்புள்ளதாக தெரிவித்துள்ளது. அதேசமயம், தற்போதைய ஆளுங்கட்சியான பாஜக 79 முதல் 94 தொகுதிகளைக் கைப்பற்றும் என்று தெரிவித்துள்ளது.

இந்த கருத்துக் கணிப்பு முடிவுகள் யாருக்கும் பெரும்பான்மைக்கு அதிகமான இடங்கள் கிடைக்கும் என கூறவில்லை. இந்த நிலையில் மதச்சார்பற்ற ஜனதா தளம் அரசியல் நகர்வு மிகுந்த முக்கியத்துவம் வாய்ந்ததாக பார்க்கப்படுகிறது. ஒருவேளை, தொங்கு சட்டப்பேரவை அமைந்தால், ஜனதா தளம் ஆதரவு தேவைப்படும். எவ்வாறாயினும், இது மீண்டுமொரு அரசியல் ஸ்திரத்தன்மைக்கு வழி வகுக்கும் என்றே அரசியல் ஆய்வாளர்கள் கருத்து தெரிவித்து வருகின்றனர்.