முட்டை விலை தொடர் சரிவால் நாமக்கல்லில் கோழி பண்ணையாளர்கள் அதிர்ச்சி!

நாமக்கல் மண்டலத்தில் உள்ள 1000க்கும் மேற்பட்ட முட்டைக் கோழிப்பண்ணைகள் உள்ளன. இதன் மூலம் தினசரி சுமார் 5 கோடி முட்டைகள் உற்பத்தி செய்யப்படுகின்றன. இங்கு உற்பத்தியாகும் முட்டைகள் தமிழக அரசின் சத்துணவு திட்டத்திற்கும், வெளி நாடுகளுக்கு ஏற்றுமதிக்கும் அனுப்பி வைக்கப்படுகின்றன. மேலும், தமிழ்நாட்டில் உள்ள அனைத்து மாவட்டங்களுக்கும், கேரளா உள்ளிட்ட வெளி மாநிலங்களுக்கும், தினசரி லாரிகள் மூலம் முட்டைகள் விற்பனைக்கு அனுப்பி வைக்கப்படுகின்றன.

தேசிய முட்டை ஒருங்கிணைப்புக்குழு நிர்ணயிக்கும் விலைக்கே, பண்ணையாளர்களிடம் இருந்து வியாபாரிகள் முட்டை கொள்முதல் செய்ய வேண்டும். இந்நிலையில் முட்டை கொள்முதல் விலை இன்று 30 காசுகள் குறைந்து 4 ரூபாய் 60 காசுகளாக விலை நிர்ணயம் செய்யப்பட்டது.

நாமக்கல் மண்டலத்தில் கடந்த 9 ம் தேதி ஒரு முட்டை ரூ. 5.65 காசாக உயர்ந்து, முட்டை கொள்முதல் வரலாற்றில் புதிய உச்சத்தை தொட்டது. இதனால் பண்ணையாளர்கள் மகிழ்ச்சியடைந்தனர். இந்த புதிய விலை 20 நாட்கள் மட்டுமே நீடித்தது. கடந்த 21ம் தேதி முதல் முட்டை விலை தொடர்ந்து சரிவடைந்ததால் 8 நாட்களில் 1 ரூபாய் 25 காசுகள் வரை குறைந்து இன்று ஒரு முட்டையின் விலை ரூ.4.90 ஆக நிர்ணயிக்கப்பட்டுள்ளது. முட்டை விலை தொடர்ந்து குறைந்து வருவதால் பண்ணையாளர்கள் கவலையடைந்துள்ளனர்.

இந்த தொடர் விலை சரிவு குறித்து பண்ணையாளர்கள் கூறுகையில், தமிழகத்தில் தைப்பூசம் மற்றும் வட மாநிலங்களில் முட்டை விற்பனை கடுமையாக பாதிப்பு போன்ற காரணங்களால் நாமக்கல்லில் முட்டை விற்பனை குறைந்து முட்டைகள் அதிகளவில் பண்ணைகளில் தேக்கமடைந்தது. இதனால் விற்பனையை அதிகரிக்கும் நோக்கில் முட்டை விலை தொடர்ந்து குறைக்கப்பட்டு வருவதாகவும் இந்த விலை மேலும் குறைய வாய்ப்புள்ளதாகவும் தெரிவித்தனர்.