மதுரையில் நடைபெறும் தொழில் நிறுவனங்களுக்கான கடன் முகாம்- விவரங்களைத் தெரிந்துகொள்க

மதுரையில் தமிழ்நாடு தொழில் முதலீட்டுக் கழகம் கிளை அலுவலகத்தில் குறு, சிறு மற்றும் நடுத்தர தொழில்களுக்கான சிறப்பு தொழில் கடன் முகாம் நேற்று துவங்கியுள்ளது. இந்த முகாம் ஆனது வரும் செப்டம்பர் 2ம் தேதி வரை நடக்கிறது. கடன் கோரி அணுகும் நிறுவனங்களுக்கு உரிய முறையில் வழங்கப்படும் என்று மதுரை ஆட்சியர் அனீஷ் சேகர் தெரிவித்துள்ளார்.

தமிழ்நாடு தொழில் முதலீட்டுக் கழகம் 1949ல் துவங்கப்பட்டது. இக்கழகம் மாநில அரசின் ஆதரவுடன் இதுவரை எண்ணற்ற தொழிற்சாலைகளுக்கு கடனுதவியை அளித்து வருகிறது. தமிழகத்தின் தொழில் வளர்ச்சிக்கு முன்னோடியாக திகழ்கிறது.

இந்த நிறுவனங்கள் மூலம் குறு, சிறு மற்றும் நடுத்தர தொழில் பிரிவுகளுக்கு புதிய தொழிற்சாலைகளை அமைக்கவும், தற்போது இயங்கிக் கொண்டிருக்கும் நிறுவனங்களை விரிவுபடுத்தவும் உதவுகிறது. மேலும், உற்பத்தியை பெருக்கவும் பல்வேறு சிறப்புத் திட்டத்தின் கீழ் கடனுதவி வழங்கி வருகிறது.

மேலும் தமிழ்நாடு தொழில் முதலீட்டுக் கழகம் கடனுதவிக்கு அப்பாற்பட்டு, தொழில் முனைவோருக்கு மூலப்பொருள் கொள்முதல், சந்தைப்படுத்துதல் தொடர்பான விளக்கங்கள் மற்றும் ஜி.எஸ்.டி தொடர்பான சந்தேங்களுக்கான விளக்கங்கள் ஆகியவை பெற உதவுதல் போன்ற தொழில்முறை சிரமங்களை களைவதற்கும் உறுதுணையாக உள்ளது.

தமிழ்நாடு தொழில் முதலீட்டுக் கழகம் மதுரை கிளை அலுவலகத்தில் குறு, சிறு மற்றும் நடுத்தர தொழில்களுக்கான சிறப்பு தொழில் கடன் முகாம் நேற்று (17-ந்தேதி) முதல் வருகிற 2-ந் தேதி வரை நடைபெறுகிறது.

இச்சிறப்பு தொழில் கடன் முகாமில் டி.ஐ.ஐ.சியின் பல்வேறு கடன் திட்டங்களின் சிறப்பு அம்சங்கள், மத்திய-மாநில அரசுகளின் மானியங்கள் (மூலதன மானியம், வட்டி மானியம் மற்றும் இதர மானியங்கள்), புதிய தொழில் முனைவோர் மற்றும் தொழில் நிறுவன மேம்பாட்டுத் திட்டம் குறித்த விரிவான விளக்கங்கள் தரப்படுகிறது.

தகுதியான தொழில்களுக்கு தமிழக அரசின் 25 சதவீத முதலீட்டு மானியம் அதிகபட்சமாக ரூ.1.50 லட்சம் வரை வழங்கப்படும். இந்த முகாம் காலத்தில் சமர்ப்பிக்கப்படும் பொதுகடன் விண்ணப்பங்களுக்கு ஆய்வு கட்டணத்தில் 50 சதவீதம் சலுகை அளிக்கப்படும்.

இந்த அரிய வாய்ப்பினை தொழில் முனைவோர்கள் பயன்படுத்தி தங்களது தொழில் திட்டங்களுடன் வருகை தந்து தொழில் கடன் மற்றும் மத்திய-மாநில அரசுகளின் மானிய சேவைகளை பயன்படுத்திக் கொள்ளுமாறு மதுரை மாவட்ட ஆட்சியர் அனீஷ் சேகர் கேட்டுக்கொண்டுள்ளார்.