முகப்பு /செய்தி /லைஃப்ஸ்டைல் / மலையேற்றத்தின் போது காட்டுத் தீயில் சிக்கினால் என்ன செய்ய வேண்டும்..?

மலையேற்றத்தின் போது காட்டுத் தீயில் சிக்கினால் என்ன செய்ய வேண்டும்..?

மலையேற்றத்தின் போது காட்டுத் தீ

மலையேற்றத்தின் போது காட்டுத் தீ

ஒருவேளை உங்களுக்கு ஓடும் வாய்ப்பு இல்லை என்றால் போர்த்தி நிலத்தில் படுத்துக்கொள்ளுங்கள்

  • Last Updated :
  • Chennai, India

மலையேற்றம் என்பது பலருக்கு மிகவும் சாகச மற்றும் சுவாரசியமான பொழுதுபோக்குகளில் ஒன்றாகும். குறிப்பாக இயற்கை ஆர்வலர்கள் மற்றும் மன அழுத்தம் நிறைந்த வேலை செய்பவர்கள் அந்த வாழ்க்கையிலிருந்து ஒரு சின்ன ஓய்வு பெற விரும்புபவர்கள் மலை ஏற்றத்தை சிறந்த பயண திட்டமாக தேர்ந்தெடுப்பார்கள்.

ஆனால் இப்போது வெயில் காலம் தொடங்கிவிட்டது. வெப்பத்தால் காடுகள் காய்ந்து காட்டுத்தீ இது. கொடைக்கானல் மலைப்பகுதிகளில் சில இடங்களில் காட்டுத்தீ ஏற்கனவே பரவி அதை தீயணைப்பு துறையினர் அணைத்தனர். ஒரு காட்டில் உங்கள் மலையேற்றத்தின் நடுவில், திடீரென்று காட்டுத் தீயை எதிர்கொண்டு, நீங்கள் சிக்கிக்கொண்டால் என்ன செய்வீர்கள்? 

காட்டுத் தீயை நம்மால் எளிதில் கணித்து கட்டுப்படுத்த முடியாது. காட்டுத் தீயின் வேகம் காடுகளுக்கு காடு அவற்றின் நிலம் மற்றும் தாவரங்களைப் பொறுத்து மாறுபடும். பொதுவாக, புல்வெளிகள், செங்குத்தான சரிவுகள் மற்றும் புதர் நிலங்களில் தீ வேகமாக பரவுகிறது. இத்தகைய திடீர் பேரழிவுகளைக் கையாள கற்றுக்கொள்ள வேண்டும். ஒரு பாதுகாப்பான மலையேற்றத்தை எவ்வாறு திட்டமிடுவது என்பது பற்றி  உங்களுக்கு சொல்ல இருக்கிறோம்.

மலையேற்றம் மேற்கொள்பவர்கள் காட்டுத் தீயில் சிக்கும்போது பின்பற்ற வேண்டிய சில வெளியேற்ற குறிப்புகள் கீழே பட்டியலிடப்பட்டுள்ளன.

தீ பற்றி புகாரளிக்கவும் : நீங்கள் காட்டு பகுதியில் ட்ரெக்கிங் கிளம்பும்போதே அந்த காட்டின் பாதுகாப்பு அலுவலர்கள் தொடர்பு எண் வாங்கிச்  செல்லுங்கள். ஒருவேளை நீங்கள் வழியில் காட்டுத் தீயைக் கண்டால், உடனடியாக வன நிர்வாகத்திற்கு நிலைமையைத் தெரிவிக்கவும். அவசரகால சேவைகள் அல்லது நிர்வாகத்தை விரைவில் தொடர்புகொள்வது தீயணைப்பு வீரர்களுக்கு விரைவாக  தீயை கட்டுப்படுத்தவும் நிறுத்தவும் உதவும். மிக முக்கியமாக, முன்கூட்டியே தகவல் அனுப்புவது பயணிப்பவர்கள் மட்டுமல்லாது சுற்றி இருக்கும் பலரின் உயிரைக் காப்பாற்றும்.

மேல் நோக்கி ஓடவும் : காட்டுத் தீ பரவுகிறது எனில் வந்த வழியே இறங்கிவிடலாம் என்கிற தவறான முடிவை ஒரு போதும் எடுத்துவிடாதீர்கள். ஏனெனில் காட்டுத் தீ பரவும்போது கீழ்நோக்கிய தாழ்வுப் பகுதியை நோக்கிதான் வேகமாக பரவும். எனவே மேல்நோக்கியவாறு ஓடுவது நல்லது. முடிந்தால் எரிந்த இடத்தை நோக்கி சென்றுவிடுங்கள். அங்கு மீண்டும் தீ வராது.

புகையை சுவாசிப்பதைத்  தவிர்க்கவும்:

காட்டுத்தீ அதிகப்படியான புகையை உருவாக்கும் மற்றும் அந்த புகையில் இருக்கும் கார்பன்-மோனாக்சைடு மிகவும் ஆபத்தானது. குறிப்பாக குழந்தைகளுக்கும், இதய பிரச்சனைகள் மற்றும் மூச்சுக்குழாய் அலர்ஜி மற்றும் ஆஸ்துமா போன்ற சுவாச பிரச்சனைகளால் பாதிக்கப்படுபவர்களுக்கும் கடுமையான பாதிப்பை ஏற்படுத்தும். எனவே, காட்டுத்தீ புகை இருந்தால் உடனடியாக உங்கள் மூக்கு மற்றும் வாயை கைக்குட்டை, துணி, மாஸ்க் வைத்து மூடவும். அடர்த்தியான புகை இருந்தால், ஈரமான துணி மூலம் சுவாசிப்பது நல்லது. இது புகையை உள்ளிழுப்பதைத் தவிர்க்க உதவும்.

பாதுகாப்பான நிலத்தை நோக்கிச் செல்லவும் :

காட்டுத் தீயைக் கண்டால், உடனடியாக திறந்த நிலம், பாறைப் பகுதிகள், நீர்நிலைகள் அல்லது ஏற்கனவே எரிந்த பகுதிகளை நோக்கிச் செல்லவும். செங்குத்தான சரிவுகள், புல்வெளிகள், மரக் கட்டைகள் மற்றும் மரக் குப்பைகள் அதிகம் உள்ள பகுதிகளில் ஒதுங்குவதைத் தவிர்க்கவும். காட்டுத்தீ பரவும் வேகத்தை நம்மால் கற்பனை செய்து கூட பார்க்க முடியாது. எனவே, முடிந்தவரை வேகமாக வெளியேறுங்கள். ஏற்கனவே எரிந்த இடங்களில் மீண்டும் தீ பரவ வாய்ப்பில்லை என்பதால் அந்த நேரத்திற்கு எரிந்த இடங்களுக்கு நகர்வது ஒரு நல்ல தற்காப்பு யுத்தியாக அமையும்.

நிலத்தில் போர்த்தி படுங்கள்:

நெருப்பு பரவும் நேரம் படுக்க சொல்கிறீர்களே என்று கேட்கலாம். ஆனால் ஒருவேளை உங்களுக்கு ஓடும் வாய்ப்பு இல்லை என்றால்  அதுதான் சரியான வழியாக இருக்கும். உங்களிடம் தண்ணீர் இருக்கிறதா என்று பாருங்கள். உங்கள் ஆடைகளை அல்லது போர்வை இருந்தால் அதை ஈரம் செய்து அதை போர்த்தி முகம் கீழே தரையில் படும்படி தரையில் படுத்துக்கொள்ளுங்கள்.

தாழ்வான பள்ளத்தில் படுப்பது அல்லது நீர்நிலைகளில் மூழ்குவது மிகவும் நல்லது. ஆடைகளை நனைத்து, உடலை முழுவதும் மண்ணால் மூடுவதும், அதிக வெப்பத்தில் இருந்து உங்களை பாதுகாக்க உதவுகிறது. இப்படி படுக்கும்போதும் புகையை நேரடியாக சுவாசிக்காமல், மூக்கு வாயை மூடிக்கொள்ளுங்கள்.

இதையும் பாருங்க: “குறைந்த பணத்தில் சொகுசு வாழ்க்கை”... உலகின் வசதியான நகரம் எது தெரியுமா..? 

காட்டுத்தீயை அணைக்க முயலுங்கள் :

top videos

    காட்டுத்தீயை அணைப்பது மிகவும் ஆபத்தானது மற்றும் கடினமான பணியாகும். ஆனால் காட்டுத்தீ சிறிய இடத்தில் இப்போது தான் தொடங்கி உள்ளது என்றால் பசுமையான மரக்கிளைகள், கனமான போர்வைகள் அல்லது மணலைப் பயன்படுத்தி தீயை அணைக்க முயற்சிக்கலாம். ஆனால் தீயை அணைக்கும் போது கவனமாக இருக்க வேண்டும், ஏனென்றால் எந்த நேரத்திலும் தீப்பிழம்புகள் உங்களைச் சூழ்ந்து கொள்ளலாம். எனவே, அதிக ஆபத்து உள்ள இடத்திலிருந்து விலகிச் சென்று அணைக்க முயலுங்கள்.

    First published:

    Tags: Forest, Travel Guide, Travel Tips