ரோட்டுக்கடை ஸ்டைல் பேல் பூரி வீட்டிலேயே செய்யலாம்..! - இதோ ரெசிபி!

ரோட்டுக்கடை உணவுகள் என்றால் பிடிக்காதவர்கள் யாரும் இருக்க முடியாது. பானிபூரி, மசாலா பூரி, பேல் பூரி, சிக்கன் பக்கோடா, காளான் என எதுவாக இருந்தாலும் நாம் கடைகளில் சப்புக்கொட்டி சாப்பிடுவோம். அவை ஆரோக்கியமான உணவு இல்லை என்று நமக்கு நன்றாக தெரியும். ஆனால், அதில் இருக்கும் சுவை நாக்கில் தாண்டவமாடும்.

வட இந்தியர்களின் பிரபல நொறுக்குத் தீனியான பேல் பூரியினை மிகவும் எளிமையான முறையில் நம் வீட்டிலேயே செய்வது எப்படி என இங்கு காணலாம்.

தேவையான பொருட்கள் :

வேர்க்கடலை - 2 ஸ்பூன்.

பொறி மிக்சர் - 1 கப்.

கடுகு எண்ணெய் - 1 ஸ்பூன்.

வெங்காயம் - 1.

தக்காளி - 1.

உருளைக்கிழங்கு - 1.

மிளகாய் தூள் - 1 ஸ்பூன்.

மஞ்சள் - 1 ஸ்பூன்.

உப்பு - தேவைக்கு ஏற்ப.

செய்முறை :

பேல் பூரி செய்வதற்கு முன்னதாக, எடுத்துக்கொண்ட தக்காளி, வெங்காயம் மற்றும் உருளைக் கிழங்கு ஆகியவற்றை சுத்தம் செய்து பொடியாக நறுக்கிக்கொள்ளவும்.

தொடர்ந்து கடாய் ஒன்றினை அடுப்பில் வைத்து சூடேற்றவும். கடாய் நன்கு சூடேறியதும் இதில் வேர்க்கடலை சேர்த்து நன்கு வறுத்து தனியே எடுத்து வைக்கவும்.

தற்போது பேல் பூரி தயார் செய்ய, ஒரு பெரிய பாத்திரத்தை எடுத்துக் கொள்ளவும். பின்னர் இதில் பொறி மிக்சர், வேர்க்கடலை, மிளகாய் தூள் மற்றும் உப்பு சேர்த்து நன்கு கிளறி விடவும்.

தொடர்ந்து இதனுடன் பொடியாக நறுக்கிய தக்காளி, வெங்காயம் மற்றும் உருளைக்கிழங்கு சேர்த்து நன்கு கலந்துக்கொள்ளவும்.

Also Read | வாத்து முட்டையில் ஆம்லெட் செஞ்சுருக்கீங்களா..? ட்ரை பண்ணுங்கள்...!

இறுதியாக இதனுடன் சிறிதளவு கடுகு எண்ணெய் சேர்த்து நன்கு கலந்துவிட சுவையான பேல் பூரி தயார்.

காரம் நிறைந்த இந்த பேல் பூரியினை அப்படியே ஒரு கோப்பையில் இட்டு சுவையாக பரிமாறலாம். பேல் பூரியை பரிமாறும் போது இதன் மீது சிறிதளவு கொத்தமல்லி தழைகளை பொடியாக்கி சேர்த்துக்கொள்ளவும்.

முறையாக தயார் செய்யப்பட்ட இந்த பேல் பூரியுடன் இரண்டு அவித்த முட்டையினை பொடியாக நறுக்கி சேர்த்து, கிளறி பரிமாற முட்டை பேல் பூரி ரெடி.