தனி விண்கலம் மூலம் பூமிக்கு வந்த விண்வெளித் தக்காளி

விண்வெளியில் விளைவிக்கப்பட்ட தக்காளி தனி விண்கலம் மூலம் அமெரிக்காவின் புளோரிடாவிற்கு கொண்டு வரப்பட்டுள்ளது.

மனிதனின் விண்வெளி மீதான மோகமும் தாகமும் எப்போது தீருமோ தெரியவில்லை. அப்படிப்பட்ட விண்வெளியை ஆராய்வதற்காக அமைக்கப்பட்ட சர்வதேச விண்வெளி ஆய்வு மையத்தில் அதிசயம் ஒன்றை நடத்திக் காட்டியிருக்கிறது நாசா. ஆம் விண்வெளியில் மனிதன் நடமாடுவதற்கே கடும் முயற்சி  எடுக்க வேண்டிய நிலையில் அங்கு தக்காளியை விளைவித்து காட்டியிருக்கிறார்கள் விண்வெளி வீரர்கள்.

விண்வெளியில் மனிதர்களுக்கான சில உணவுப்பொருட்களை நிலவில் இருந்து கொண்டு வரப்படும் மண்ணைக் கொண்டு விளைவிக்க முடியுமா என்ற முயற்சியை கடந்தாண்டே தொடங்கி விட்டது நாசா. அந்த முயற்சியில் இப்போது முதல் வெற்றியாக தக்காளி விளைந்திருக்கிறது. வரும் காலத்தில் சர்வதேச விண்வெளி ஆய்வு மையத்திற்கோ, நிலவிற்கோ அல்லது செவ்வாய் கிரகத்திற்கோ ஆய்விற்காக செல்லும் விண்வெளி வீரர்களுக்கு இயற்கையான பிரஷ்சான காய்கறிகள் கொண்ட உணவு கிடைக்க வேண்டும் என்ற நோக்கத்தில் தான் இந்த முயற்சி முன்னெடுக்கப்பட்டுள்ளது.

இதற்காக நிலவில் இருந்து மண் கொண்டுவரப்பட்டு பதப்படுத்தப்பட்டு அந்த மண்ணில் தக்காளி விதை விதைக்கப்பட்டது. பூமியில் இருந்து கொண்டு செல்லப்பட்ட தக்காளி விதையும் விண்வெளியின் சீதொஷ்ண நிலைக்கு ஏற்ப பதப்படுத்தப்பட்டிருந்தது. அந்த தக்காளி விதைக்கப்பட்டு முளைத்த செடியில் சரியாக 104 நாட்கள் கழித்து தக்காளி விளைந்திருக்கிறது.

அந்த தக்காளி பறிக்கப்பட்டு ஸ்பேஸ் எக்ஸ் நிறுவனத்தின் சிறப்பு விண்கலம் மூலம் நேற்று பூமிக்கு கொண்டு வரப்பட்டுள்ளது. அமெரிக்காவின் புளோரிடா மாகாணத்தில் இருக்கும் நாசாவிற்கு சொந்தமான ஸ்பேஸ் சென்டரலில் அந்த தக்காளி வைக்கப்பட்டு பல்வேறு சோதனைகளுக்கு உட்படுத்தப்பட உள்ளது.

இது, ஒரு முன்னோட்ட முயற்சி என்றும், இதில் வெற்றி பெற்றால் பெரிய அளவில் தக்காளி உள்ளிட்ட காய்கறிகள் மற்றும் பழங்களை விண்வெளியில் விளைவிக்க முடியும் என்றும் நாசா நம்பிக்கை தெரிவித்துள்ளது. பொதுவாகவே தோட்ட வேலைகளில் ஈடுபடுவது மனதை இலகுவாக்கும் வேலை. விண்வெளி மையத்தில் வீரர்கள் இது போன்ற தோட்ட வேலைகளில் ஈடுபடும் போது, மனதிற்கு இதமாகவும், ரிலாக்சாகி மன அழுத்தம் குறையும் என்றும் நாசா நம்புகிறது எனவே விண்வெளி விவசாயத்தை ஊக்கப்படுத்துவதில் நாசா முனைப்பு காட்டி வருகிறது.

கட்டாயம் வாசிக்க: ஏவுகணை சோதனையை பார்வையிடும் கிம் ஜோங் உன் மகள் - வைரலாகும் போட்டோ

அப்படி விண்வெளி தோட்டம் சாத்தியமானால் சாலட் தயாரிக்கப் பயன்படும் இலகு ரக காய்கறிகளை விளைவித்து வீரர்களே சாலட் செய்து சாப்பிட்டுக் கொள்ளலாம். அதற்காகத் தான் பாடுபடுகிறது நாசா. அதோடு, விண்வெளியில் இருந்து கொண்டு வரப்பட்டுள்ள தக்காளியை பார்ப்பதற்கு பலரும் ஆவலோடு இருக்கிறார்களாம்.