பள்ளிக்குள் துப்பாக்கிச் சூடு நடத்திய சிறுவன்... 8 மாணவர்கள் பரிதாப பலி.. அதிர்ச்சி சம்பவம்..!

தென்கிழக்கு ஐரோப்பிய நாடுகளில் ஒன்றான செர்பியாவில் பள்ளிக்குள் நுழைந்து 14 வயது சிறுவன் நடத்திய கண்மூடித்தமான துப்பாக்கிச்சூடு தாக்குதலில் 8 மாணவர்கள் உட்பட 9 பேர் உயிரிழந்தனர்.

அந்நாட்டு தலைநகர் பெல்கிரேடில் உள்ள Vladislav Ribnikar school என்ற ஆரம்ப தொடக்க பள்ளியில் 8 ஆம் வகுப்பு மாணவர் ஒருவர் துப்பாக்கிச் சூடு நடத்தினார். இதில், பள்ளி பாதுகாவலர் மற்றும் 8 மாணவர்கள் நிகழ்விடத்திலேயே உயிரிழந்தனர். மேலும், ஆசிரியர் உட்பட 6 மாணவர்கள் படுகாயம் அடைந்தனர்.

தகவல் அறிந்து விரைந்த காவல்துறையினர், துப்பாக்கிச்சூடு நடத்திய மாணவரை கைது செய்தனர். இதில் படுகாயம் அடைந்தவர்கள் மருத்துவமனையில் தீவிர சிகிச்சை பெற்று வருகின்றனர்.

இதையும் வாசிக்க: சம்பளம் தரவில்லை... அமைச்சரை துப்பாக்கியால் சுட்டுக்கொன்ற பாதுகாவலர்...!

பள்ளியில் மிகவும் அமைதியாக இருந்த மாணவர், திடீரென்று துப்பாக்கிச்சூட்டில் ஈடுபட்டதாக ஆசிரியர்களும், சக மாணவர்களும் தெரிவித்துள்ளனர். துப்பாக்கிச்சூடு தொடர்பாக காவல்துறையினர் விசாரணை மேற்கொண்டுள்ளனர்.