பின்னணி இசை தரம் - சந்தோஷ் நாராயணனை பாராட்டிய ராஜமௌலி

நானி நடிப்பில் தமிழ், தெலுங்கு, கன்னடம், மலையாளம் ஆகியோய மொழிகளில் உருவாகியுள்ள தசரா படம் கடந்த 30 ஆம் தேதி வெளியாகி நல்ல விமர்சனங்களைப் பெற்றுவருகிறது. இந்தப் படத்தில் நானிக்கு ஜோடியாக கீர்த்தி சுரேஷ் நடித்துள்ளார். ஸ்ரீகாந்த் ஒடேலா இந்தப் படத்தை இயக்கியுள்ளார்.

இந்தப் படத்தின் சந்தோஷ் நாராயணன் இசையில் மைனர் வேட்டிக்கட்டி உள்ளிட்ட இந்தப் படத்தின் பாடல்கள் டிரெண்டிங்கில் இருந்துவருறது. அவரது பின்னணி இசைக்கும் விமர்சகர்கள் மத்தியில் பாராட்டுகள் குவிந்துவருகின்றன.

இந்தப் படத்தில் பிரகாஷ் ராஜ், சமுத்திரக்கனி, சாய் குமார், பூர்ணா உள்ளிட்டோர் முக்கிய வேடங்களில் நடித்துவருகின்றனர். இந்தப் படம் வெளியாகி 4 நாட்களில் உலக அளவில் ரூ. 87 கோடியை வசூலித்துள்ளதாக கூறப்படுகிறது.

இந்த நிலையில் இந்தப் படத்தை பாராட்டி இயக்குநர் ராஜமௌலி ட்வீட் செய்துள்ளார். அவரது பதிவில், ராவான கதாப்பாத்திரங்கள், இயல்பான நிலப்பரப்பு ஆகியவற்றுடன் மனதைத் தொடும் காதல் காட்சிகளால் மனதை ஈர்க்கிறார் இயக்குநர் ஸ்ரீகாந்த் ஒடேலா . இதுவரையில்லாத அளவுக்கு சிறப்பாக நடித்திருக்கிறார் நானி.

கீர்த்தி தனது கதாப்பாத்திரத்தை வெகு இயல்பாக கையாண்டிருக்கிறார். அனைத்து நடிகர்களும் கவனம் ஈர்த்தனர். ஒளிப்பதிவு முதல் தரம். பின்னணி இசை சிறப்பு. தசரா குழுவுக்கு வாழ்த்துகள் என்று குறிப்பிட்டுள்ளார். இதனையடுத்து அவருக்கு படக்குழுவினர் நன்றி தெரிவித்துள்ளனர்.