பொன்னியின் செல்வன் 2 படத்தை பிரபலப்படுத்த பக்கா பிளானுடன் களமிறங்கும் படக்குழு - கைகொடுக்குமா?

பொன்னியின் செல்வன் திரைப்படத்தின் இரண்டாம் பாகத்தை பிரபலப்படுத்தும் பணியில் படக் குழுவினர் இறங்கியுள்ளனர்.  சென்னையில் இன்று தொடங்கும் விளம்பர நிகழ்ச்சி வரும் 27ஆம் தேதி வரை பல்வேறு ஊர்களில் நடைபெறும் என கூறியுள்ளனர்.

மணிரத்னம் இயக்கத்தில் கடந்த ஆண்டு செப்டம்பர் 30ம் தேதி வெளியான பொன்னியின் செல்வன் முதல் பாகம் உலகம் முழுவதும் பெரும் வெற்றி அடைந்தது. அந்த திரைப்படம் சுமார் 500 கோடி வசூலை எட்டியதாக கூறப்பட்டது.  இந்த நிலையில் பொன்னியின் செல்வன் இரண்டாம் பாகத்தை வரும் 28 ஆம் தேதி வெளியிடுகின்றனர்.

இந்த திரைப்படம் வெளியாக இன்னும் 10 நாட்களே இருந்தாலும் படத்தை பிரபலப்படுத்தும் பணிகள் தொடங்கப்படவில்லை.  இதனால் 28ம் தேதி படம் வெளியாகிறது என்ற தகவல் ரசிகர்களை பெருமளவில் சென்றடையவில்லை. இதை ரசிகர்களே பல இடங்களில் கூறி வந்தனர்.

இந்த நிலையில் இன்று அண்ணா பல்கலைக்கழகத்தின் பொன்னியின் செல்வன் இரண்டாம் பாகத்தில் இடம்பெறும் தீம் பாடலை பட குழுவினர் அனைவரும் கலந்து கொண்டு வெளியிடுகின்றனர். அந்த நிகழ்வில் சுமார் 6,000 மாணவர்கள் கலந்து கொள்வார்கள் என கூறப்பட்டுள்ளது. இதைத்தொடர்ந்து நாளை கோயம்புத்தூர், செல்லும் படக் குழுவினர் அங்கு ரசிகர்களை சந்தித்து உரையாடுகின்றனர்.

அதன் பின் 17-ம் தேதி சென்னையில் செய்தியாளர்களை சந்திக்கின்றனர். அதை முடித்துகொண்டு கொச்சி, பெங்களூர்,  ஹைதராபாத், டெல்லி, மும்பை ஆகிய இடங்களில் பொன்னியின் செல்வன் இரண்டாம் பாகத்தை விளம்பரப்படுத்தும் பணியில் படக்குழுவினர் ஈடுபடுகின்றனர். முதல் பாகத்திற்கும் இதுபோன்று நிகழ்ச்சிகள் நடைபெற்றன.

அதன் தொடர்ச்சியாக தற்போது இரண்டாவது பாகத்திற்கும் பல்வேறு நகரங்களுக்கு பட குழுவினர் செல்கின்றனர். அதில் நடிகர்கள் விக்ரம், கார்த்தி, ஜெயம் ரவி, திரிஷா, ஐஸ்வர்யா ராய் மணிரத்னம் என பலரும் கலந்து கொள்ள உள்ளனர்.  இது படத்துக்கு கைகொடுக்குமா என்று எதிர்பார்ப்பு எழுந்துள்ளது.