டாடா படத்தின் வெற்றியை தொடர்ந்து பிரபல டான்ஸ் மாஸ்டர் இயக்கத்தில் நடிக்கும் கவின்!

சீரியல்கள் மற்றும் பிக்பாஸ் நிகழ்ச்சியின் மூலம் கவனம் ஈர்த்தவர் சீரியல் நடிகர் கவின். லிப்ட் திரைப்படத்தை தொடர்ந்து டாடா திரைப்படத்தில் கவின் நடித்திருக்கிறார். இந்த திரைப்படத்தை அவரின் கல்லூரி நண்பரான கணேஷ் கே.பாபு என்பவர் இயக்கி அறிமுகமாகியுள்ளார். இதில் கவினுடன் பீஸ்ட் திரைப்படத்தில் நடித்த அபர்ணா தாஸ், 'முதலும் நீ முடிவு நீ' ஹரிஷ் மற்றும் கே.பாக்யராஜ், வி.டி.வி.கணேஷ் உள்ளிட்டோர் நடித்திருக்கின்றனர். கடந்த பிப். 10ஆம் தேதி திரையரங்குகளில் வெளியான படம், 'டாடா'.  இப்படத்தை அம்பேத் குமார் தயாரித்திருந்தார்.

தற்போதைய சூழலில் இருக்கும் ஒரு இளைஞனின் பின்னணியில் டாடா திரைப்படத்தின் கதை எழுதப்பட்டிருக்கிறது. கல்லூரி மாணவன் தொடங்கி, பொறுப்பான அப்பாவாக மாறும் தருணம் வரை காட்சிகள் இடம்பெறுகின்றன.

படம் நல்ல வரவேற்பை பெற்றது. பொதுமக்கள் மட்டுமின்றி திரைப் பிரபலங்கள் பலரும் கவின் நடிப்பிற்கும் படக்குழுவினருக்கும் பாராட்டுகளை தெரிவித்தனர். திரையரங்கில் வெற்றியடைந்தது மட்டுமின்றி ஓடிடியிலும் சமீபத்தில் வெளியாகி ரசிகர்கள் மத்தியில் பெரும் வரவேற்பை பெற்று வருகிறது.

இந்நிலையில் டாடா படத்தின் வெற்றியை தொடர்ந்து தற்போது கவின் அடுத்த படத்தில் நடிப்பதற்காக ஒப்பந்தமாகியுள்ளார். அந்த வகையில் தற்போது வந்துள்ள தகவலின்படி கவின் அடுத்த படத்தை இயக்குவது டான்ஸ் மாஸ்டர் சதீஷ் என்று தகவல் வெளியாகி உள்ளன. இந்தப் படம் சதீஷிற்கு இயக்குநராக அறிமுகம் ஆகும் முதல் படம் ஆகும். இந்த படத்தை ரோமியோ பிச்சர்ஸ் ராகுல் தயாரிக்க இருப்பதாகவும் இந்த படத்தின் படப்பிடிப்பு விரைவில் தொடங்கும் என்றும் கூறப்படுகிறது. இந்த திரைப்படமும் காதல் கதைக்கு முக்கியத்துவம் உள்ள படம் என சொல்லப்படுகிறது.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.