இனி பாலிவுட்டில் கலக்குவாரா விஜய் சேதுபதி? சாதனை படைத்த 'ஃபார்ஸி'..!

பேமலி மேன் இணையத்தொடரின் மூலம் புகழ்பெற்ற ராஜ் மற்றும் டிகே இணைந்து இயக்கியுள்ள அமேசானின் ஒரிஜினல் வெப் தொடர், ஃபார்ஸி. கிரைம் த்ரில்லர் தொடரான ஃபார்ஸி, தொடர்ந்து தோல்வியை சந்தித்து வந்த ஷாஹித் கபூருக்கு திருப்புமுனையாகவும், விஜய் சேதுபதிக்கு டிஜிட்டல் சினிமா உலகின் அறிமுகமாகவும் அமைந்தது.

கள்ளநோட்டு அச்சடிக்கும் ஷாகித் கபூர் கோஷ்டியை பிடிக்கும் போலீஸ் அதிகாரியாக விஜய் சேதுபதி நடித்துள்ளார். மைக்கேல் கதாபாத்திரத்தில் விஜய்சேதுபதி வரும் காட்சிகள் அனைத்திலும் தனது ஸ்டைலான நடிப்பால் கெத்துக் காட்டி பாலிவுட் ரசிகர்களை கவர்ந்திருந்தார்.

ராஷி கண்ணா, ரெஜினா, கே.கே.மேனன், அமோல் பலேகர் உட்பட பலரும் இந்த வெப் சீரிஸில் நடித்துள்ளனர். எட்டு அத்தியாயங்களைக் கொண்ட இந்த சீரிஸ் பிப்ரவரி 10-ம் தேதி முதல் ஸ்ட்ரீமிங் செய்யப்பட்டு வருகிறது.

இதையும் படிக்க :  பொன்னியின் செல்வன் 2 இசை வெளியீட்டு விழா? - ரசிகர்களுக்கு சர்ப்ரைஸ் கொடுத்த படக்குழு

இந்நிலையில், ஃபார்ஸி வெப் சீரியல் இந்தியாவில் அதிகம் பார்வையாளர்களால் பார்க்கப்பட்டுள்ளதாக ஆர்மேக்ஸ் மீடியா (ormax) நிறுவனம் அறிவித்துள்ளது. அந்நிறுவனம் நடத்திய ஆய்வறிக்கையில் இந்தியாவில் இதுவரை 3 கோடியே 70 லட்சம் நபர்களால் பார்க்கப்பட்டுள்ளதாக தெரிவிக்கப்பட்டுள்ளது.

இதுகுறித்து மகிழ்ச்சி தெரிவித்துள்ள இயக்குநர்கள் ராஜ் மற்றும் டிகே, அனைவரது அன்புக்கும் நன்றி என்று கூறியுள்ளனர். கத்ரீனா கைஃப் உடன் மெர்ரி கிறிஸ்துமஸ், ஷாருக்கானுக்கு வில்லனாக அட்லீ இயக்கத்தில் ஜவான் படத்திலும் விஜய்சேதுபதி நடித்து வரும் நிலையில், ஃபார்ஸி படத்திற்கான இந்த வரவேற்பு, பாலிவுட்டில் விஜய்சேதுபதிக்கு என தனி இடத்தை பதிவு செய்வதற்கான அச்சாரமாக பார்க்கப்படுகிறது.