தளபதி விஜய்யின் லியோ படத்தில் விக்ரம் அமர்? சுவாரசியத் தகவல்

லோகேஷ் கனகராஜ் இயக்கத்தில் தளபதி விஜய் நடித்துவரும் லியோ படத்தின் காஷ்மீர் ஷெட்யூல் சமீபத்தில் நிறைவடைந்தது. இதனையடுத்து இந்தப் படத்தின் அடுத்த கட்ட படப்பிடிப்பு சென்னையில் விரைவில் துவங்கப்படவிருக்கிறது. படம் குறித்த அப்டேட்டுகளை தயாரிப்பு நிறுவனம் வெளியிட்டுவருகிறது. இருப்பினும் ரசிகர்களின் ஒரு கேள்விக்கு மட்டும் இன்னும் விடை கிடைத்தபாடில்லை.

இந்தப் படம் லோகேஷ் சினிமாட்டிக் யூனிவர்ஸ் அடிப்படையில் உருவாகிறதா அல்லது தனிப்படமாக உருவாகிறதா என்பது தான் அந்த கேள்வி. பட பூஜையின் போது கைதி படத்தில் நெப்போலியன் என்ற போலீஸ் கான்ஸ்டபிளாக நடித்திருந்த மரியம் ஜார்ஜ் கலந்துகொண்டிருந்தார். மேலும் படக்குழு காஷ்மீர் சென்றபோது படக்குழுவுடன் விக்ரம் படத்தில் ஏஜெண்ட் டீனாவாக கலக்கிய வசந்தியும் இடம்பெற்றிருந்தார். இதனால் லியோ படம் எல்சியூவில் இடம்பெற்றுள்ளதாக ரசிகர்கள் டிகோட் செய்தனர்.

இந்த நிலையில் விக்ரம் படத்தில் அமர் என்ற வேடத்தில் நடித்திருந்த பகத் பாசில் லியோவில் படத்தில் விரைவில் இணைகிறராராம். இந்தப் படத்தில் அமராகவே வருவதாக தகவல் வெளியாகியுள்ளது. இதுகுறித்த அதிகாரப்பூர்வ அறிவிப்பை விரைவில் எதிர்பார்க்கலாம் என்று கூறப்படுகிறது.

சமீபத்தில் படக்குழுவினர் காஷ்மீரில் பணியாற்றிய அனுபவம் குறித்து பேசிய வீடியோவை தயாரிப்பு நிறுவனமான செவன் ஸ்கிரீன் ஸ்டுடியோஸ் வெளியிட்டிருந்தது. இந்த நிலையில் சிறிது இடைவேளைக்கு பிறகு இந்தப் படத்தின் படப்பிடிப்பு விரைவில் சென்னையில் துவங்கப்படவிருக்கிறது. பான் இந்தியன் படமாக உருவாகி வரும் இந்தப் படத்துக்கு அனிருத் இசையமைக்கிறார். மனோஜ் பரமஹம்சா இந்தப் படத்துக்கு ஒளிப்பதிவு செய்கிறார்.