டிக்கெட் இருக்கு ஆனா உள்ள விடமாட்றாங்க... தியேட்டரில் படம் பார்க்க நரிக்குறவர்களுக்கு அனுமதி மறுப்பா?

'சில்லுனு ஒரு காதல்', 'நெடுஞ்சாலை' உள்ளிட்ட படங்களை இயக்கி ஒபிலி கிருஷ்ணா இயக்கத்தில் சிம்பு நடித்துள்ள படம் 'பத்து தல'. இதில் பிரியா பவானி சங்கர், கௌதம் கார்த்திக், கலையரசன், கௌதம் வாசுதேவ் மேனன், டீஜே, ஜோ மல்லூரி,  மலையாள நடிகை அனு சித்தாரா, ரெடின் கிங்ஸ்லி ஆகியோர் முக்கிய கதாபாத்திரத்தில் நடித்துள்ளனர்.

வெந்து தணிந்தது காடு படத்தை தொடர்ந்து ஸ்டூடியோ கிரீன் சார்பில்  கே.ஈ.ஞானவேல் ராஜா இந்தப் படத்தை தயாரிக்கிறார்.  முன்னதாக இந்த திரைப்படம் டிசம்பர் மாதமே வெளியாகும் என்று எதிர்பார்க்கப்பட்டது.  ஆனால், ஒரு சில காரணங்களால் படத்தின் வெளியீடு 3 மாதங்கள் தள்ளி வைக்கப்பட்டது. இதனால் பிப்ரவரி அல்லது மார்ச் மாதம் வெளியாகும் என தகவல் வெளியாகி வந்தது. இந்நிலையில், இன்று பத்து தல படம் வெளியாகியுள்ளது.

படம் வெளியாகி ரசிகர்களிடையே கலவையான விமர்சனங்களை பெற்று வரும் நிலையில் சென்னை கோயம்பேட்டில் உள்ள ரோகிணி திரையரங்கில் சிம்புவின் பத்து தல படத்தை பார்க்க வந்த நரிகுறவர்களை ஊழியர்கள் உள்ளே அனுமதிக்காத வீடியோ தற்போது இணையத்தில் பரவி வருகிறது.

படத்திற்கு உரிய டிக்கெட்டுகளை வைத்திருந்த போதிலும் திரையரங்கு ஊழியர்கள் அவர்களை உள்ளே அனுமதிக்க மறுக்கின்றனர். இரண்டு பெண்கள் உட்பட ஐந்து நரிகுறவர்கள் சென்ற நிலையில் ஊழியர்கள் அவர்களிடம் கையசைத்து உள்ளே விடமுடியாது வெளியே செல்லுங்கள் என்று கூறுகின்றனர்.

கண்டிக்க பட வேண்டும்... https://t.co/SckXOdQfwH

— John Mahendran (@Johnroshan) March 30, 2023

இந்நிலையில் இந்த வீடியோ இணையத்தில் வைரலான நிலையில்,  நரிகுறவர்கள் என்பதால் அனுமதி மறுக்கவில்லை, யு/ஏ சான்றிதழ் பெற்ற பத்து தல படத்திற்கு சிறுவர்களை அழைத்து வந்ததால் அனுமதிக்கவில்லை என ரோகிணி திரையரங்க உரிமையாளர் பன்னீர் செல்வம் நியூஸ் 18 தமிழ்நாடு செய்திக்கு விளக்கம் அளித்துள்ளார்.

Follow @ Google News: கூகுள் செய்திகள் பக்கத்தில் நியூஸ்18 தமிழ் இணையதளத்தை இங்கே கிளிக் செய்து ஃபாலோ செய்யுங்கள்.. செய்திகளை உடனுக்குடன் பெறுங்கள்.