பயணியிடம் ஒரு கப் டீ-க்கு ரூ.70 வசூல் செய்தது ஏன்? - சர்ச்சைக்கு விளக்கம் அளித்த ரயில்வே துறை

ரயில்களில் உணவு மற்றும் பானங்கள் ஆகியவை மலிவான விலையில் கிடைக்கும் என்று நீங்கள் நினைத்துக் கொண்டிருந்தால் உங்களுக்கு அதிர்ச்சி தான் மிஞ்சும். ரயில் பயணத்தின் போது ஒரு கப் டீ அருந்துவதற்காக பயணி ஒருவர் ரூ.70 செலுத்தினார் என்றால் உங்களால் நம்ப முடிகிறதா? உங்களுக்கு அதிர்ச்சி அளிப்பதாக இருந்தாலும் இது தான் உண்மையில் நடந்தது.

அண்மையில் சதாப்தி விரைவு ரயிலில் பயணம் செய்தவர்களில், பயணி ஒருவர் ஒரு கப் டீ வாங்கினார். அவரிடம் டீ-யின் கட்டணமாக ரூ.20 மற்றும் அதற்கு சேவை கட்டணமாக ரூ.50 என மொத்தம் ரூ.70 வசூல் செய்துள்ளனர். இதற்கான பில்லையும் ரயில் பணியாளர்கள் வழங்கினர். பயணி அந்த பில்-ஐ சமூக வலைதளங்களில் பகிர்ந்த நிலையில், அது வைரல் ஆனது.

பயணம் எப்போது நடந்தது

மத்திய பிரதேச மாநிலம், போபாலில் இருந்து டெல்லிக்கு கடந்த ஜூன் 28ஆம் தேதி சதாப்தி விரைவு ரயில் சென்றது. அதில், பயணித்த நபர், ஒரு கப் டீ-க்கு ரூ.70 கட்டணமாக செலுத்தியுள்ளார். இரண்டாம் முறை டீ அருந்தியபோதும் அதே கட்டணம் அவரிடம் வசூல் செய்யப்பட்டது. இதுகுறித்து சமூக வலைதளத்தில் அவர் வெளியிட்ட பதிவில், “ரூ.20 மதிப்புள்ள டீ-க்கு ரூ.50 ஜிஎஸ்டி வரி விதித்துள்ளனர். எல்லாவற்றையும் சேர்த்து ஒரு டீ-யின் விலை ரூ.70 ஆகிறது. இது அதிசயமான கொள்ளை அல்லாமல் வேறென்ன?’’ என்று பதிவிட்டிருந்தார்.

Also Read : கணவரை வாடகைக்கு விட்டு டிரெண்டான மனைவி... குடும்ப சூழலால் நிகழ்ந்த வினோதம்!

ஆனால், அவரது பதிவிற்கு பதில் அளித்த நெட்டிசன்கள், கூடுதலாக வசூல் செய்யப்பட்டிருப்பது ஜிஎஸ்டி வரி அல்ல, அது சேவைக் கட்டணம் என்று திருத்தம் செய்தனர். அதே சமயம், சேவைக் கட்டணம் என்றாலும் கூட ரூ.50 வசூல் செய்வது என்பது மிக, மிக அதிகம் என்றும் குறிப்பிட்டிருந்தனர்.

புகார்கள் புதிதல்ல

ரயில்களில் உணவு மற்றும் இதர சேவைகளை வழங்கும் ஐஆர்சிடிசி நிறுவனத்தின் மீது இதுபோன்ற புகார்கள் வருவது இது முதல்முறை அல்ல. எண்ணற்ற முறை இதுபோல பல புகார்களை பயணிகள் முன்வைத்துள்ளனர். ஆனால், எந்தவொரு புகாருக்கும் அவர் செவி சாய்க்கவில்லை என்றும் கூறப்படுகிறது.

377

விளக்கம் அளித்த ரயில்வே துறை

பயணியிடம் கூடுதல் கட்டணம் வசூலிக்கப்பட்டதாகப் புகார் எழுந்த நிலையில் அதுகுறித்து ரயில்வே அதிகாரிகள் விளக்கம் அளித்துள்ளனர். அதாவது, கடந்த 2018ஆம் ஆண்டில் இந்திய ரயில்வே துறை ஒரு சுற்றறிக்கையை வெளியிட்டிருக்கிறது. ராஜ்தானி அல்லது சதாப்தி போன்ற ரயில்களில் பயணம் செய்யும் பயணிகள், டிக்கெட்டுகளை முன்பதிவு செய்யும்போதே உணவு மற்றும் பானங்களுக்கும் பதிவு செய்துவிட வேண்டும். அவ்வாறு பதிவு செய்யாமல் பயணத்தின் போது நீங்கள் வாங்கும் டீ, காஃபி அல்லது உணவு போன்றவற்றுக்கு சேவைக் கட்டணமாக ரூ.50 வசூல் செய்யப்படும் என்று அந்த சுற்றிக்கையில் கூறப்பட்டுள்ளது.

இதற்கு முன்பு சதாப்தி மற்றும் ராஜ்தானி ரயில்களில் உணவு ஆர்டர் என்பது கட்டாயமாக இருந்திருக்கிறது. அது விருப்பத்திற்கு உரியதாக மாற்றம் செய்யப்பட்ட பிறகு தான், முன்பதிவு செய்யாமல் பயணத்தின் போது ஆர்டர் செய்யும் பயணிகளிடம் சேவைக் கட்டணம் வசூல் செய்யப்படுகிறது.