5 நாளில் ரூ. 500 கோடியை தாண்டிய வசூல்… இந்தி சினிமாவில் சாதனை படைக்கும் ஷாரூக்கானின் பதான்!

ஷாருக்கான், தீபிகா படுகோனே, ஜான் ஆப்ரஹாம், சிறப்பு தோற்றத்தில் சல்மான் கான் உள்ளிட்டோர் நடித்துள்ள பதான் திரைப்படம் கடந்த புதனன்று வெளியாகி மிகப்பெரும் வரவேற்பை பெற்று வருகிறது. பாலிவுட்டில் கடந்த சில ஆண்டுகளாக வெளியான முன்னணி நடிகர்களின் படங்கள் பெரிய அளவில் வசூலை பெறவில்லை. ஆமிர் கான், ஹிருத்திக் ரோஷன், அக்ஷய் குமார் உள்ளிட்டோர் நடித்த படங்கள் வர்த்தக ரீதியில் தோல்வி அடைந்தன. இந்தநிலையில் பதான் திரைப்படம் வசூலை அள்ளிக் குவித்து வருவதால் படக்குழுவினர் மட்டுமல்லாமல் ஒட்டுமொத்த பாலிவுட் திரையுலகமும் மகிழ்ச்சி அடைந்துள்ளது. இதனால் அடுத்தடுத்த படங்களுக்கும் நல்ல வரவேற்பு கிடைக்கும் என்ற நம்பிக்கை இந்தி திரையுலகில் ஏற்பட்டுள்ளது.

தமிழ்நாட்டிலும் பதான் திரைப்படம் கணிசமான வசூலை பெற்றுள்ளது. இந்த படம் வெளியாவதற்கு முன்னதாக, படத்தை புறக்கணிக்குமாறு சமூக வலைதளங்களில் ஹேஷ் டேக்குகள் ட்ரெண்ட் செய்யப்பட்டன. ஆனால் அவற்றை மீறி, படக்குழுவினர் எதிர்பார்க்காத வகையில் இந்த படத்திற்கு வரவேற்பு கிடைத்துள்ளது. இந்த நிலையில் 5 நாட்கள் முடிவில் பதான் திரைப்படம் ரூ. 543 கோடி வசூலித்திருப்பதாக தயாரிப்பு நிறுவனமான யாஷ்ராஜ் பிலிம்ஸ் அறிவித்திருக்கிறது.

பாலிவுட்டில் இந்த வாரமும் பெரிய பட்ஜெட் படங்கள் எதுவும் வெளியாகாத நிலையில், பதான் திரைப்படம் தொடர்ந்து வசூலை அள்ளிக் குவிக்கும் என்று எதிர்பார்க்கப்படுகிறது. கே.ஜி.எஃப் 2 திரைப்படம் வசூலித்து அளவுக்கு பதான் கலெக்சன் செய்யும் என்று பாலிவுட் திரை துறையினர் கணித்துள்ளார்கள். தனது முந்தைய படங்களை போன்று அல்லாமல், பதான் திரைப்படத்திற்கு ஷாருக்கான் தனிப்பட்ட முறையில் புரமோஷன் ஏதும் செய்யாதது குறிப்பிடத்தக்கது.