ஓ.டி.டி-யில் வாரிசு திரைப்படம் எப்போது ரிலீஸ் தெரியுமா?

விஜய் நடிப்பில் வெளியாகி வெற்றிகரமாக ஓடிக் கொண்டிருக்கும் வாரிசு படத்தின் ஓடிடி வெளியீடு குறித்த புதிய தகவல் வெளிவந்துள்ளது. பொங்கலையொட்டி வெளியான வாரிசு திரைப்படம், உலக அளவில் சுமார் ரூ.300 கோடி வசூலித்திருக்கும் என்று மதிப்பிடப்பட்டுள்ளது. விஜய்யுடன் ராஷ்மிகா மந்தனா, சரத்குமார், பிரகாஷ் ராஜ், ஜெயசுதா, ஷாம், ஸ்ரீகாந்த் உள்ளிட்டோர் இந்தப் படத்தில் நடித்திருந்தனர். பல ஆண்டுகளுக்குப் பின்னர் விஜய் குடும்ப பின்னணி கதையில் நடித்து, வரவேற்பை பெற்றார்.

இந்த படத்தை தெலுங்கில் முன்னணி தயாரிப்பாளராக இருக்கும் தில் ராஜுவின் ஸ்ரீ வெங்கடேஸ்வரா கிரியேஷன்ஸ் நிறுவனம் தயாரித்திருந்தது. வம்சி பைடிபள்ளி இந்தப் படத்தை இயக்கியிருந்தார். தமன் இசையில் படத்தில் இடம்பெற்ற பாடல்கள் அனைத்தும் மெகா ஹிட் ஆகியுள்ளன. சமீபத்தில் இந்த படத்தில் இருந்து முதல் வீடியோ பாடல் ஜிமிக்கி பொண்ணு வெளியாகி நல்ல வரவேற்பை பெற்றது. தற்போதும் தமிழகத்தில் பல திரையரங்குகளில் இந்த திரைப்படம் வெற்றிகரமாக ஓடிக்கொண்டிருக்கிறது. இந்நிலையில் வாரிசு திரைப்படம் அமேசான் ப்ரைம் ஓ.டி.டி. தளத்தில் வரும் 22ஆம் தேதி வெளியாகும் என்று தகவல்கள் வெளிவந்துள்ளன. இது குறித்த அதிகாரப்பூர்வ அறிவிப்பை இன்னும் சில தினங்களில் அமேசான் ப்ரைம் நிறுவனம் வெளியிடும் என்று எதிர்பார்க்கப்படுகிறது.

வாரிசு படத்தின் வெற்றியை தொடர்ந்து, விஜய் தற்போது லோகேஷ் கனகராஜ் இயக்கும் தளபதி 67 படத்தில் நடித்து வருகிறார். இந்த படத்தின் டைட்டில் மற்றும் ப்ரோமோ நாளை மாலை 5 மணிக்கு வெளியாக உள்ளது. இதனை அறிவிக்கும் வகையில் இன்று போஸ்டர் ஒன்று வெளியிடப்பட்டு பெரும் வரவேற்பை பெற்றுள்ளது.